Nach dr Fasnacht...

Das Joor hän mir uns am 10i in dr Pizzeria Mesa in Münchestai droffe.

Nachere kurze Stärggig in Form vo Kaffi, Tee oder Bier, sin mir denn z Fuess wytergange. S OK het uns ins Industriegebiet glotst. Interessanterwys hets au dört e Motorrad-Club gää so dass alli zerscht gmeint hän, mit göhn wieder mol zu andere Rogger.

Falsch dänggt! Mir sin zum FlipperClub Regio Basel und hän zerscht emol e Zmorge-Buffet ka. Nach däre feyne Sach isch es denn in dr Halle nääbedraa losgange: Let's FLIPPER!

60! verschiedeni Flipperkäschte hän uff uns gwartet und mir hän wie dr Deufel losglegt. Es het so zimlig jede vo uns jede Kaschte ussprobiert. Die wo hän welle, hän au no amene glaine Turnierli mitgmacht. Gwünner löhn mir jetzt anonym.

Drno sin mir denn mit Tram und Bus eimol quer durch die ganzi Stadt zur Thomaskirche. Dört gits sone mexikanischs Beizli "La Piratita". Dr Name het mit unserem Süschee z due ka, s Ässe jedoch weniger. Egal: mir hän musikalischi Unterhaltig botte bekoh und hän sehr, sehr guet gässe dört. Je länger mit dört gsy sin, umso besser isch d Stimmig worde. Am Höhepunggt sin mir denn wiederum uff en ÖV in d Stadt und hän drno gässlet, gässlet und gässlet.

Mir dangge em OK für dä glungeni Bummel - auf ein Neues!