Fasnacht 2025

SUJET: Schnursus honorum - dr Wäg zem Sürbegg

Dr Zeedel

(brinslet vom Frank)

D Natur het sich Zyt gno, um alles z‘ erschaffe,
Vom Aizäller bis zu uns Menschenaffe.
Vier Milliarde Joor en Evolution und e Symbiose, 
Vom erschte Fyyr, zem Strom us der Steggdose. 
Zerscht als Einzelmasgge und denn als Clique,
Sinn mir Mensche durch d Savanne gritte.
Usgroodet, Usgstorbe oder iberläbt, ‘s isch fatal, 
Regiert het denn no stargg der lieb Zuefall.

Mit em Homo Sapiens het das Resslispiil Fahrt ufgno,
Het är im Zuefall langsam s Zepter ewägg gno.
Gross bisch gsi als Häuptling, Pharao oder Keenig
Gebore bisch, doch gmacht derfir hesch wenig.
Erscht mit der Zyt het me denn doch gmerggt,
Dä Wäg isch nid fair und au no verkeert.
Beloont wärde sell Ysatz und Gschigg im Minimum,
Drumm git’s ab sofort der „Cursus Honorum“.
Kasch Dir Di Wäg dermit an d Spitze verdiene,
E bitzeli bestäche schadet do sicher au niene.
Doch e wirgliggi Wahl hesch trotzdäm nid,
Dy Wäg isch gä, zu 99 Prozänt im Schnitt.
Als Normalo vom Huus nääbedra
machsch e Lehr und hänggsch viilicht der Maischter a.
Isch Di Babbe e grosses Dier und isch vo Wält,
Gohsch ans Gymi, studiersch und schwimmsch im Gäld.
Machsch no der Major und kasch befähle,
Lohsch Di innere Bangg in Verwaltigsroot wähle.

Do z‘Basel bisch halt zinftig gsi fir an d Macht,
Oder hesch guet ghiroote, so het’s der Daig gmacht.
Fir d Fasnacht hesch der Wäg iber e Clique gno
Und bisch vom Binggis zem Stamm ko.
Wenn hesch kenne Zahle lääse und Knepfli drugge,
Bisch go schränze innere Gugge.
Als ebber vom Daig mit Fasnachtshärzli,
Bisch e Chaise oder schnoogsch zu de Kerzli.
Als Bursch mit Stolz und ähnligem Format
Spilsch bi den Olymper der „Alt Kamerad“.
Im mindere Basel het’s Divärses grad ummen Egge:
VKB, Naarebaschi und s Optimum d Schnurebegge!

Me sott meine, mir dien is entwiggle und wärde gschiider,
Ufklärt, „woke“ bis in d Hoorspitz, es isch z’wiider. 
Do wärde Kinder in d Laufbahne yynezichtet,
Bisch im Laischtigszuzg „A“, wirsch fascht higrichtet.
Wär macht denn hit none Lehr und duet schaffe?
D Realität und d Vernunft dien stark usenandklaffe.
Der Cursus Honorum isch, jetzt dient‘s mol begryffe,
Fir jede individuell und me ka ihn nid umschiffe.
E jede het sy Zyt, me muess si halt lo,
E Fuessabdrugg in unsere Wält z‘hinterlo!

Au do sin mir Schnurebegge allne voruus, 
Mainsch De spinnsch und kunnsch nid druus?
Es isch wohr und me muess e bitz schlugge,
So git‘s Lyt, die gehn vo de Clique in e Gugge.
Mir hän Bänggler, wo dien pfyffe,
Und Pfyffer wo dien bänggle, me ka‘s begryffe.
Ganz schlimm, aber är blibt do stuur 
Git‘s e Pfyffer wo’s versuecht als Dambuur.
Doch der letscht Schritt, dä dien mir jetzt mache,
Mir symbiotisiere e Stuefe wyter, muesch nid lache.
So sin mir nonig ganz 100 Joor,
Mit 75 d Sürkrüter fascht so alt - bime Hoor.
Sit 24 Joor simmer zämme als Päärli uf däre Wält,
E Clique mit ‘me Waage wo „Dublerkepf“ verdailt.

Drumm hämmer der „Schnursus honorum“ kreiert,
Wo me ney zem „Sürbegg“ mutiert.
Duesch d Laitere vo der Evolution erklimme,
In der Fasnacht ufstyge, hecher uffe goht‘s nimme.
So fyyre mir gmeinsam und dien pfyffe und drummle,
Mit lachendem Härz schwankend durch d Gasse bummle,
Mit Dublerkepf vom Waggis, Mimeesli vom Ressli-Wage,
Dien mir mit de Fiess gnisslig in de Räbbli baade.
Isch’s denn verby und bisch druurig, Ändstraich, wunderbar, 
Kunnsch zu de Junge „Sürbegge“, dasch doch klar!
-----------------------------------------------------------------------------------------
D Ladärne-Usstellig isch vom Fasnachtsmändig zoobe bis am Mittwuchmorge wie gwohnt uf em Minschterplatz. Zur glyche Zyt kame uf em Kasärne-Hof go Wääge und Requisite bestuune.
-----------------------------------------------------------------------------------------
#AuFirDi: Cliqueluft schnubbere kasch au am Samschdig, 22. März ab de 10:30 am Morge vo dr Mittlere Brugg bis zem Claraplatz. Drummle und Pfyffe im Glaibasel. E Aggtion vo Glaibasler Clique.
-----------------------------------------------------------------------------------------
Bisch e luschtige Bueb ab 6 Joor und 
wottsch by uns lehre pfyffe oder drummle, 
denn mäld Di doch grad aa:
jungigarde@schnurebegge.ch
Mir freuen uns uff Di! 
-----------------------------------------------------------------------------------------