3 Dääg uff dr Gass

Sujet: Nit ganz hundert!

Zeedel

Z’ haiss baadet, in der Bire waich,
Nit alli Tässli im Schränggli inne,
Nit ganz dicht, im Kopf nur Saich,
Dure bi root, e Schuss ab, spinne,
Plemplem, verruggt und duredrillt,
Ibere gschnappt, irr, verschroobe,
Gaga, s Hirni ’bitzli z’ fescht grillt,
E Gnall, e Vogel in der Bire-n-oobe,
Bedepperet, wirr, vellig dure Wind,
Iberegschnabbt, e Kabbe-n-aa,
Ain an der Waffle, Honig im Grind,
E grosse Sprung in der Schissle ha,
E Schrybli lugg, e Maise oder Magge,
Dureknallt, im Oberstibli nimmi rächt,
E Fligg wägg, Rad ab, nit ganz bagge,
Näb de Schueh, im Dängge schlächt,
Baar Schryybli hänn e bitzli gluggt,
Der Intelligänzquotiänt e Fählbedraag,
Ibere gschnabbt, Eggen ab, verruggt,
Nimm alli Lättli meh am Gartehaag,
Bekloppt, meschugge, e Dachschade,
Und aine an der Klatsche zwischedry,
In der Bire Strau statt Hirni glaade.
Kurz und bref: Nit ganz hundert sy!

De merggsch es wohrschyynts bald:
Mir schwätze do vom Trump Donald!
Em Maischter im Fake-News verzelle.
Zem Voruus het en niemer me welle,
Will em im Kopf e baar Reedli fähle,
Doch dien’s en ainwääg denn wähle.
Und dien derno verstuunt realisiere,
Wien är sinnlos duet Dekret visiere,
Wien är mit Fabuliere und mit Liege
Sich sy aig’ni Wält wott zämmebiege.
Doch laider isch’s jo, wenn är bällt,
Nid nur sy aigni, nai au unseri Wält!

Är isch in beschter Gsellschaft inne,
Vo Männer, wo im Kopf dien spinne:
Der Putin Wladimir isch irr und wirr,
Verhaut mit Geklirr s Fridensgschirr,
Duet in Sälbstverliebthait sich verirre
Und in unsinnig brutali Kriegswirre.
Aber au der Lukaschenko Alexander
Isch gaischtig nie ganz binenander;
Duet d Wahle fir sich manipuliere
Und s Volgg in d Armuet yyne fiehre.
Der al-Assad massemordet schlimm;
Zem Gligg jetzt aber ändlig nimm!
Au vyyl anderi vo der irre Konsorte,
Predige Wasser, aber ässe Doorte:
Xi Jinping, Ortega, Maduro Nicolas,
Viktor Orbán, et cetera et cetera…
Der ägyptisch Abdel Fattah al-Sisi,
Muess uf däre Lischte au derby sy.
Der Kim Jong-un, mer sage’s knabb,
Het bstimmt der greschti Eggen ab:
Im Pomp uf Egopartys ummelungere
Und s aige Volgg brutal lo hungere.

Duesch s Gschichtsbuech ergrinde,
Kasch au dert so gsteerti Type finde:
Der Caligula, Nero, Herodes oder Attila,
Hänn alli e riisegrossen Eggen ab gha.
Robespierre, Dschingis Khan, Franco,
Idi Amin, Saddam und der Hitler sowiso.
Benito Mussolini, Stalin und Pol Pot,
Me do au unbedingt ufflischte sott.
Und s Volg isch laider nie z’ benyyde:
Duet artig nigge aber unsääglig lyyde.
Despote, Wahnsinnigi, Irri, Spetter,
Wo sälber glaube, sy sige d Getter,
Dien ihres Rych gschiggt optimiere
Und s Volgg mit Triggli manipuliere,
Ass die nit z’vyl frooge und studiere,
Diens ’ne «Brot und Spili» offeriere:
S Volgg vo der Realideet ablängge,
Ass die gar nit vyyl nochedängge.
Sälbetsmool z’ Rom d Arena mit Leie,
Hitte mit ’bitz modärnere Spilereie:
Statt Gladiatore und coole Waagerenne,
«Reality-TiVi» mit Schreie und Pflenne.
Social Media in Ändlosschleife via Händy,
Streame, Youtube, nächtelang ohni Ändi,
TikTok, WhatsApp, Twitter, vulgo «X»,
Super Mario und Mindcraft und Netflix.
Anstell vo Brot in der Fast-Food-Buude
Hämbörger, Fritte und Donuts foode.

Mir halte nyt vo Herrscher und Despote,
Wo s Volgg beliege und betriege wänn.
Und do, z’ Basel, duet’s au guet groote,
Will mir d Gettin «Frau Fasnacht» hänn!
Die macht e jedes Johr bi uns ihr Bsiechli,
Denn hämmer’s drei Dääg fridlig, gladd.
Statt Brot und Spil git’s Fasnachtskiechli,
Und Fasnachtskläng in unserer Stadt.

P.S.:
Mir Schnurebegge gänn’s jo gärn zue:
Au mir stehn mängmol näb’ de Schueh.
Mir sinn e gsteerti, wildi Clique-Horde.
Und das Johr scho 99 Johr alt worde!
«Nit ganz hundert!» grinse do d Spetter.
Und mir hänn sogar pärseenligi «Getter»:
Unseri Waage-Partner, d Sürkrütt-Waggis,
Die sinn jetz au scho rächt alti Knaggis,
Dien dasjohr ihres 75. Jubileeum begoh.
Gratulation! Alles Gueti! Machet wyter so!
Und als Legionäär diemer (mit ’bitz Mieh),
Ganz untertänig ihre «Götter-Waage» zieh