Fasnacht 2015

SUJET: 100 Johr Himmelfahrtskomando

Dr Zeedel

(brinslet vom Cedric)

1914 het me mit 8 Flieger, 10 Pilote und eim Resärvemotor
Grindet was als hitte au no umme fliegt:
Der Bundesroot het sini Luftwaffe griegt!
Gnau syt 100 Johr hänn unseri Flieger Kerosin in de Hoor!

Si dien starte, fliege und (maischtens) au lande.
Ganz vyyl hänn si scho dure gstande.
Ganz generell dien mir, wenn mir ummeluege, kopiere.
(Was au in der Armee nur sälte duet funktioniere…)

Mir Starte

G‘startet isch im letzte Johr e gar e mängi Sach.
Gwisses guet und anders au grad nur „mit Ach und Krach“:

Gstartet isch in Basel s „verkehrsfreii Vorwärtsbeweege“!
Und sithär jetze stosse - die neue Büss, die grosse
Nur no mit de Drämmli zämme (nämmli).
Ob sich bi de Fuessgänger jetzt hingege,
D Angscht vor em Verkehr duet leege?

Gstartet isch der Eric Wäber (mehrfach) zem sy Huet vom
Parlamäntständer z‘näh.
D Grossröt dien fyyre - und wyter lyyre,
Statt z‘studiere wieso‘s e so ein iberhaupt duet gäh.

Gstartet isch au en initiative zum d Expats z‘integriere:
Wär weniger het, lenger blibt, dä ribt me uff,
Das git e Buff und macht uns muff!
Oobe dien sie lieber iber gueti Styyrzahler lamentiere.

Gstartet hänn - und das freut uns sehr -
Syt em vieri demorge
Die drei Dääg ohni Sorge.
Vo so Sache hätte mer gärn mehr!

Mir versueche z‘fliege

E mänge Vogel duet au scho fliege,
doch zum‘s als rosig z‘ beschribe, miesst me liege.

Fliege duet unseri Crew und umkreist der Turm zue Roche.
Eigentlig umschribt dä nur ei Wort, nämmlig „moche“!
Vyyl Platz sell‘s gäh, het me uns versproche
Es wärde die läärstehende Hüüser abbroche.

Fliege duet unseri Fliegercrew iber der Innerstadt.
D OSZE miess me kontrolliere, het me‘ne gsait.
Uf Medikamänt gege schlächt gänn d Apotheke scho Rabatt,
Si hänn die z‘ vyyyyli heissi Luft nit verdrait…

Am Fliege sinn mir Schnurebegge scho lang:
Im sibte Fasnachtshimmel finde mir uns alli wider.
Uns isch wohl do mit Drummel- und mit Piccoloklang
Vom vyyle Laufe spire mir morn sicher alli Glider.

Mir kemme-n-uff der Bode abe

Landige sinn au scho passiert.
E mänge Schogg hänn mer dasjohr kassiert.

E Bruchlandig het au s Basler Budget gha.
Do glaubt sicher unsers neu Erlemattschuelhuus dra.
D Politiker maine, die Landig sig sicher waich,
Will me nur Kinder mit Elddere ohni Stimmrächt braich…

E Bruchlandig hänn si au in Italie gha.
(Mir dängge alli viil z‘wenig dra!)
was dert die Schiff alli an Land dien bringe,
Sinn Mensche, wo verzwiiflet um e neu Lääbe mien ringe
Und mir joomere, und das isch s Schreege,
Fir simpli Lehre gäbi‘s z‘wenig Kinder, das duet ufreege
Und zimmlig zem Nohdängge bringe!

E Bruchlandig het‘s bi de Frinde vom Basler Theater gäh.
Me kennti’s jo schliesse; mir wurde das Gäld scho näh!
Für d Robi Spilaktion und anderi Kinder-Institutione.
Dert wurd sich e Batze fir d Zuekunft sowiso meh lohne!

Lande dien mir jetzt an unserne drei Lieblingsdääg.
E mänge, wo in dr Schuel krangg wär, isch wider zwääg…
Fir uns isch bi allem Negative, Beese und Schlächte,
Die Fasnacht zum s Lääbe gniesse grad s Rächte!