Fasnacht 2023

SUJET: D’Garde vo de 1926er

Dr Zeedel

(brinslet vom Peter)

1926 het si s Liecht vo der Wält erbliggt.
Si het ihr ganzes Lääbe lang mild gniggt.
Allewyl gfellig glächlet, huldvoll gwinggt,
Will ihre halt das Wingge gar nie stinggt.

Der Dood vom Babbe duet derzue fiehre,
Ass si scho bluetjung muess afoh regiere.
Statt als «Girl» go z’danze und z’dringge,
Lääbenslang ihrem Volgg go zuewingge.

Mer hänn’s vom Lizbeth, zwai vo Windsor,
«Queen» und mit der halbe Wält verlinggt.
Diszipliniert und stoisch, e Spur vo Humor.
Und wie gsait: Si lächlet, niggt und winggt.

Doch muess si nid nur ihres Volgg regiere,
Sondern au bitz e gspässigi Familie fiehre,
Wo allbott in Affäre und Skandäl versinggt.
Doch si het derzue nur gniggt und gwinggt.
Het wytter gfellig glächlet, huldvoll gwinggt,
Will ihre s Wingge, wie erwähnt, nid stinggt.

Wenn ihri Kinder mit de Falsche pfuuse
Und d Mamme bitz zvyyl Gin duet dringge
Und si das bstimmt nid duet «äämiuuse»,
Kommentiert si’s nid und duet nur wingge.

Die Britischi Politigg isch oft nid scheen:
Vo linggs und rächts wird gfightet, ginggt,
D Premierminischter kemme und si gehn.
D Queen blybt erratisch do - und winggt.

70 Johr regiert, was au nid jedem glingt!
Jeede Daag glächlet, gniggt und gwinggt.
Ohni Missdritt, ohni ai gresseri Blamage,
Mer sinn’s äxtra im Netz go dure chegge,
Mer dängge, das verdieni en Hommage,
An der Fasnacht, vo uns Schnurebegge!

Mer dien is vonere coole Frau vernaige!
Saage merci, dien au aine uf si dringge,
Dien is drey Dääg very queenisch zaige
Und e weeneli druurig «aadie» wingge!