Härzlig willkommen uff dr Syte vo dr Schnurebegge Stammgsellschaft

Wie sinn mir überhaupt entstande? Ändi 1920, also e baar Wuche vor dr zweite Fasnacht noon em Grieg, hän e baar ehemooligi Mitgliider vom uffglööste „Pump-Club“, und vo de sälbetsmool nümmen exischtierende „Alte Glaibasler“ e Fasnachtsglygge gründet, wo sich „Basler Fastnachts-Gesellschaft“ gnennt het. Under de Mitgliider sell s Grooss- und Glaibasler gha haa, und doorum het s bereits 1922 e Spaltig gää, nämlig in d Neuufflaag vo den „Alte Glaibasler“ und der „Sans Gêne“. Vier Joor spööter hän sich denn d „Schnurebegge“ vo dr „Sans Gêne“ abgspalte. Dr Namme „Schnurebegge“ stammt übrigens vom letschte Stadtdammbuur, wo als Uusriefer die amtlige Middeilige in dr Stadt verkündet het. Dä hett Beck gheissen und het könne guet und luut schnure. Und wäge däm het men iim „dr Schnurebegg“ gseit. Hüt sinn mir no eini vo de weenige reine Männerglygge. Und das wärde mer sicher die näggschte Joor no blyybe. Mir sinn e gladden und gmietlige Huffe vo rund 90 Aggtive, wo gäärn zämme Fasnacht mache und sich au under em Joor zue gselligen Aaläss dräffe dien.  Nööchers über uns erfaarsch uff dääre Homepage! Au wie du Aggtiv – oder Passivmitgliid bi uns kaasch wäärde.