Fasnacht 2014

SUJET: Die verstaubti Armee

Dr Zeedel

(brinslet vom Cedric)

Me het z‘China dief im Bode unde,
E ganzi Armee vo Krieger gfunde:
Achtdausig Krieger samt Speer und Ross
Umfasst dä gwaltig Terrakotta-Tross.

Mängmoll reise d‘Krieger in d Färni,
So träffen e baar sogar in Bärn y.
Das Wälterb isch e grossi Attraggtion,
Für die ganzi Schwyz e Sensation!

Zäh Meter wyter im Bundeshuus,
Luegt dr Muurer grad zum Fänschter us.
Die Krieger findet är nid blöd:
„Schad git‘s das i dr Schwyz no nöd!“

„Wers nöd doch eifach s allerbeschte
Die Terrakotta-Praxis z’teschte?
D’Armee nöd immer mehr verchleinere,
Nei - sofort und komplett versteinere!“

Dr Ueli het drum nid vyl z’lache,
Nume Sache, wonem z‘schaffe mache:
D Waffeplätz muess är schliesse,
S Volk will dr Gripen abschiesse.

Jungi dien lieber Zivildienscht leischte,
Militärdienscht mache, schtinggt de meischte!
E F/A-18- Pilot fliegt in e Wand,
S FIS Heer isch aifach nur e Schand…

Was ka der wältbescht‘ Armee no nütze?
S heilig Bankghaimnis schütze?
D Masseywanderig kontrolliere?
Oder d NSA usspioniere?

Duesch en Experimänt probiere -
Soldate eme Nutze zue z‘fiehre:
Als Hälfer bi dr Rammel-Bolizey,
Gits bi de Bürger e riise Gschrey.

Halt! Uns sin no e baar Idee ko,
Bevor me s‘ Heer will versteinere loo:
Gäbtis nid no vyl Böschte z’bsetze,
Wo me könnt Soldate ysetze?

Basel hät e Huffe Arbet z’biete -
Als Kasärne dörft me `s Stücki miete,
Uffgobe gäb’s, wie Sand am Meer.
Für die meischte bruucht‘s nid moll e Gwehr:

Me könnt die Männer dermit beuftrage
D Bankuszüg vo dr Bank Coop usztrage.
Oder me schickt Truppe zum Gälder zelle
Wo `s d Regierige nid hän mache welle….

Bi dr BVB e Stab ysetze,
Zum all die UT-Fäll z’ersetze.
Am Barfi e Bataillon stationiere,
Zum s neue Verkehrskonzäpt kontrolliere.

E Genietruppe wär z`verwände,
Zum alli Bauschtelle ändlig beände.
Und nid z’letscht - ganz im Vertraue:
Wär duet‘s Juillard-Tattoo uffbaue?

D‘ Greenpeace vom Dach abez‘hole
Hät me zackig dr Luftwaffe befohle,
Pontonier hämmer am Bach vermisst,
Wo plötzlig `s Seil vo dr Fähri risst..

Me könnt d’Armee scho sinnvoll nutze,
Statt si aifach so abez’butze.
Aber ‚s isch richtig – do simmer ehrlig:
Das Jammertrüppli isch sicher nid gfehrlig.

Drum bhalte mir unseri Meinig by:
Mottet dä alti Grümpel doch y!
Mr bruche Lüt, wär‘s em Land nid z’gönne?
Wo statt verteidige, hälfe könne!

Zum Fasnacht mache, bruchts kai Armee
S funktioniert beschtens – wirdsch es seh!
Die einzig Parallele wo‘s git:
Marschiere in Reih und Glid und im Schritt!