Fasnacht 2019
SUJET: Mir ryssen am Verschluss
Dr Zeedel
(brinslet vom Frank)
Mir Schwyzer, das loht sich unverhoole saage,
sinn e glei Velggli mit Idee fir alli Lääbeslaage.
Vo Gänf bis zem Bodesee, vom Rhyy bis in Tessin
Wärgzüg, Uhre, Maschine, gnau eso wie’s Ritalin.
Unseri Erfindige dien die ganzi Wält begeischtere
und loht uns der Alldaag vyyl besser meischtere!
Kasch dangg em Spaarscheller „Rex“ Abfall spaare,
mit ere Ketti schnäller als mit em Rieme Vélo faare,
dyy Znüni in Cellophan oder in Alufolie pagge,
vo dynere Quarzuhr Zyt abläse - gnau und ohni Magge,
hesch nach em Gschäft e Düscheli uff em Closomat,
bym Ründeli mit em Hündeli im Gundeli e Robidog parat,
schyynt d Sunne, hänggt d Wesch am Stewi duss,
hebsch alles zämme mit em Klettverschluss,
duesch google oder einfach durch der Äther sörfe
oder e heissi Schoggi oder e kalti Ovi schlürfe.
Au by Ässens-Innovatione, löhn mir‘s „rocke“,
ässe syt Generatione Bircher-Miesli mit Haferflogge,
e Maggi Buechstaabe-Sübbli mit ere Gmies-Boullion
oder e Börger mit Gärber-Schmelzkääs im Tourbillon.
Dangg em Nestlé dien mir d Milch als Pulver verzeere
und zur Verfyynerig in d Schoggi für ‘Taafele yneleere.
Dringgsch e Nesprésso, keisch e Würfelzugger dry,
isch au dert e Stüggli Schwyzergaischt derby.
Erscht rächt bi der Chemie und natürlig Pharmaca,
stoht die ganzi Wält hinter uns zimmlig zünftig aa.
Dangg im Laudanum vom grosse Paracelsius,
haltsch im Opium-Rusch no der gröscht Schmärz us.
Hesch e Kratzer, denn hilft dir sicher Bebanthen,
duet’s no weh derzue, git’s hindedry e Voltaren.
Fühlsch di grangg, bruchsch kinschtlig Vitamin C,
bisch hindedryy fit wie der Jimy Hendrix uf LSD.
Bruchsch e bitz Rueh git’s Rohypnol oder Valium,
fir surrendi Stöörefriid git’s zweierlei Anti-Brumm.
Ygsetzt für anderi das hän mir uns - e langi Tradizion,
wenn’s het miesse syy, au für e fremdi Legioon.
Ob Franzoos, Schwoob oder für der Babbe z‘ Rom,
s Bluet und s Bier sinn gflosse imme ändlose Strom.
Als näggschte Schritt, mit Erfahrig und none bitz Gäld,
rette mir mit em Rote und Blaue Krüz die halbi Wält.
Doch mir mache nid halt bim Mensch - ganz genau!
Mir gründe der WWF und rette der Räschte grad au.
Ihr gsehnd, mir Schwyzer hänn öbbis uff em Kaschte,
so vyyl Vif-heit wo uff unsere Schultere duet laschte.
Doch ei Erfindig, mir wänn’s nid verstegge,
zeigt am beschte, wie mir Schwyzer tygge.
Frey nach de Ricola – wär het’s erfunde,
dien mir e bitz d Vergangeheit erkunde:
Syt anno 1851 syn vyyl Lyt annere Erfindig dra,
nämmlig d Hose im Notfall schnäller dunde z’ha!
1893 isch der Ryssverschluss denne geboore,
s Renne hän mir gege der Ami Sundbegg verloore.
Vergässe gange isch der Prototyp vom Simon Frey,
bliibe isch nur s Portrait für em Munch sy Schrey.
Was het die Erfindig jetzt mit uns Schwyzer z’due?
Es isch nid offesichtlich, mir gänn’s ganz offe zue!
E winzig Land uus säxezwanzig gleine Einzelkantöön,
Vier Sprooche, wo die einte die andre kuum verstöön.
Jede uus sym eigene Dääli - mir dien nid überdryybe,
duet em andere sy Überläägeheit under d Naase ryybe.
So verschide mir sinn, Uswärtigi kenne’s kuum begryffe,
funktioniert’s und dien überall d Zehnli inenander gryffe
und heebe zämme, was eigentlig uusenander ghört,
Störige vo usse empfinde mir derby als unerhöört.
Was do denn drumm scho überhaupt gar nid goht,
isch öbber Fremds, wo by uns am Hooselade stoht.
Denn klemmt der Verschluss, gryffe mir vorsichtig y,
by uns heisst das Dail denn: „diräggti Demokratyy“.
Das bruucht e bitz Zyt, nur nid d Geduld vermysse
’s nutzt nüt, ass me am Verschluss duet ummerysse.
So git’s in däm Land, mir nenne’s e mol stuur,
zuenähmend e politischi „Ich-ryss-dra“-Kultur.
Doch weiss e jede, wo sich wie der Yogi neime gratzt,
ass es zimlig unerwünscht isch, wenn der Lade platzt.
Drumm löhn mir unterenander grossi Umsicht walte,
gänn enand d Hand und dien is immer höflig verhalte.
Sone demokratische Ryssverschluss isch e super Sach,
griegsch verschideni Kulture und Meinige unter ei Dach.
Es zeigt allerdings en Umfroog, ‘s isch zem Schysse,
‘Demokratyy wurde die Junge gar nid gross vermisse!
Die isch vyyl z‘langsam und drum en Uuslaufmodäll,
totalitär muesch sy, denn bisch stargg und schnäll.
Es isch doch wie by vyyl Verkehr mit gleine Lugge,
und soone Duubel, wo no schnäll wott yyne drugge.
Statt e Ryssverschluss und e bitzeli Augemass
heisst’s: «Mi först!» und no schnäll ufs Gaas!
Mir stelle fescht, und zwar e bitzeli konschterniert,
wäg eim Zehnli isch der ganz Verschluss kollabiert.
Das Sprichtwort: „Was lang goht wird allewyl guet!“
isch e Schwyzer Tugend, vor däre ziehn mir der Huet.
Denn au do, und ‘s isch eimool meh der klaar Bewyys,
mir sin nid immer die erschte, aber gwünne der Bryys!
30 Johr noh der Patäntierig het det Otti Winterthaler
fir e riisegrosse Koffer, voll mit Schwyzer-Taaler
die Idee vo Rinne und Rippe no bitz wyter driibe
und het mit RiRi e wohri Erfolgsgschicht gschriibe.
Abghobe het dä Ryysverschluss 1936 - ‘s isch esoo,
syt denn wird seriemässig produziert - in Mendrisio!
Doch was lehrt is die Gschicht vo däm Sundebegg?
Jä, es git Parallele zu de Junge vom Schnurebegg.
So läbt dä Verschluss im Schatte vo Knepf und Niete,
wenn’s speziell soll sy, kenne mir no e Rieme biete.
Gnau eso isch’s der Fasnacht ergange, das isch wohr.
Doch denn isch d Erlöösig koh, im gnau glyche Johr!
Syt anne 1936, kai Määrli, sondern e wohri Gschicht,
pfyffe und drummle mir Jungi Garde, ‘s isch e Gedicht!
Gnau glych wie d Zehnli vom RiRi-Ryssverschluss,
ghöre mir zämme, s Spiil und der Vordraab voruus!
Drumm ziehn mir wyter am Verschluss, nur lyycht,
und bim Gedangge dra, wärde d Äugli scho fiecht,
bhuetsam, ass die Zehnli kenne innenander gryffe,
s Liecht goht ab und es duet ruesse-n-und pfyffe,
vo de Hüügel durab, dunggel isch‘s in jedem Laade,
kasch bim Gässle mit de Fiess in de Räbbli baade,
hesch Hiehnerhut und bisch druurig, isch‘s verbyy,
stohsch s näggscht Johr bi de Schnurebegge yy