3 Dääg uff dr Gass
Sujet 2019: Reset - Zrugg uf Start
Bummel 2019
Zeedel
Gwalt! - Grieg! - Terror!
Mord! - Dood! - Horror!
Wältwytt Strytt!
Angscht wältwytt!
„Shitstorm“-Stirm! Wuetbirger!
Killer! Massemeerder! Wirger!
Panzergranaate, wo dien knalle!
Bombe, wo uff d Mensche falle!
Schogg! Schogg! Schogg! Schogg!
Scho wider lauft e Spinner Amok!
Drägg! Drägg! Drägg! Drägg! Drägg!
All‘ dä Drägg griegsch nie me ‘wägg!
Abfall! Abfall! Abfall! Abfall!
D Wält-Politygg en Augias-Stall!
Ohjeeh! Ohjeeh! Ohjeehminee!
Iberall kaputtigi, maroodi AKW!
Milliarde vo Schiffcontainer, wägem Mode-Boom!
Konsum! Konsum! Konsum! Konsum! Konsum!
Fabrigge-Giftgas-Rauch-Usstess, zwar jo verbotte,
dien d Dier- und Pflanzewält systematisch usrotte!
S Gletscher-Yys daut däglig ab! Daut ab! Daut ab!
Und suuber Dringgwasser wird dramatisch knabb!
Au an de Pol schmilzt sukzessive s Yys…
Jä, unserem Planet goht’s dräggig-mys:
S Klima, das wird als wie wermer!
D Wältbevelggerig: Als wie ermer!
Iberall wird dräggelet, bschisse und bedrooge,
wird hintergange und wird fuschtdigg glooge!
Und statt Lääbesfraid und Frohsinn z‘ zelebriere,
dien d Mensche nur no uf ihr Händy-Display stiere.
Mais! Stress! Heggtigg! Lämbbe! Konfliggt!
Au am Arbetsblatz wirdsch nur no „gfiggt“!
Praggtisch e kaine duet dergeege rebelliere,
us Angscht, är kennt sunscht d Stell verliere.
In z‘ vyyle Länder als no Foltere und d Doodesstroof.
En US-Presidänt mit‘me Verhaalte vome glaine Goof.
Im Meer verregge d Fisch wäg‘ Eel und Blastiggiggli.
Journalischte, wo steere, verschnyydet me in Stiggli.
Flichtling, wo uff winzige Schiff mien Quaale lyyde.
Mensche, wo anderschtartigi Mensche dien myyde.
Deschpote! - Populischte! - Diggtatoore!
Hass und Gwalt wärde dääglig geboore.
Merder! - Spinner! - Psychopathe!
samt ihre wirre-irre Greiel-Taate.
Gwalt! - Grieg! - Terror!
Mord! - Dood! - Horror!
Wältwytt Strytt!
Angscht wältwytt!
Schogg! Schogg! Schogg! Schogg!
Und der näggscht Spinner lauft Amok!
Drägg! Drägg! Drägg! Drägg! Drägg!
All‘ dä Drägg griegsch nie me ‘wägg!
Waas isch do los?
Aibaahnstrooss!
Wohlstandsmill, Grell und Schutt;
Planet Ärde: Bald futsch und kabutt…
Fazit: Die ganzi Menschhaits-Evoluzioons-Choose
isch, so seht‘s uus, zimmlig grindlig in d Hoose!
Oder noone ganz bitzli weniger bluemig verpaggt:
Mir Mensche hänn’s absolut vellig total „verkackt“!
Oooh, was wäär’s doch drum fir e wunderbari Wehli,
z‘ lääbe, wie sälbetsmool d Neandertaler in der Hehli!
Ganz ohni Adidas-Schueh und ohni Zalando-Sogge,
aifach im Fäll in der Hehli uff de Stai umme z‘ hogge.
Nomoll vo vorne d Menschhaits-Evoluzioon aafoh,
mit der Keule s Mammut firs Znacht z‘doot schloh,
s Fyyr (samt em Rauch) nomoll ganz ney entdegge
(Äxgyysi, Comité! Aber so sinn halt d Schnurebegge…)
Und, statt wie hitt, Infos im Netz pär Google z‘ hoole,
mit Kohlestiggli alles diräggt uff d Staiwänd z‘ moole.
Joo, ‘s wär wirgglig intressant und spannend glatt,
s Mensch-Syy nomoll ney az‘foh, uf‘me wysse Blatt!
Mer dien drum jetze kurz drei mool läär schlugge,
derno „3 – 2 – 1 – 0 !“ lutt der Countdown brille…
…und denn uff der gross „RESET“-Knopf drugge:
Und d Menschheit gaaanz zrugg an Aafang drille!
Mir dien dreihunderduusig Johr zrugg schwääbe -
und ’schwups‘ in der Zyt vo de Neandertaler lääbe!
Und d Wält wär wider - waisch wie toll und gail -
vellig unberiehrt und grien und scheen und hail.
Und mer wärde dernoo, ‘s soll bitte kaine lache,
bi däm zwaite Versuech ALLES besser mache!
Doch ebbis mien mer Eich jetz g‘stoh, liebi Lyt:
Uns‘ri Idee wär zwar genial, doch nutzt si is nyt.
Ai wichtig Detail verhinderet dä RESET-Schritt:
Dää Knopf, zem druffdrugge, git’s laider gar nit…