Schnurebegge Schlurbbi  -  Fasnacht 2019


 Myni Baiz – Dyni Baiz ?!

Du mainsch, mir kemme nimm ganz mit
und froggsch ys, isch’s denn none Hit
e Süschee z’bringe – wo ‘s nimm gitt?
Myni Baiz – isch Dyni Baiz
die Pintekeer vo komischem Raiz
dä aidgenössisch Baize-Ritt
vier Joor lang – e Färnsee-Kitt
nai – um die ellai goots nit….
dä Baizeknüller isch verby
mir keere naimen anderscht yy…
denn d Baiz vo unsre Schnurebegge –
die isch no lang nit uf de Wegge
und s’haisst nit, isch’s my Baiz isch’s dyni
by uns haissts, s’isch e jedem syni
mer kemmen denn – ganz ohni Drugg –
am Schluss no uf das Thema zrugg
vorhäär aber - das verdraits
zerscht nomoll zrugg in d’ Färnsee-Baiz
zwaimool am Daag do diens-dy närve
mit dääre Bildschirm-Frässkonsärve
mänggge Pseudo-Gourmet-Kuchihirsch
goot mit aim fyr sy Baiz uff d Pirsch
und lossts mit alle Mittel grache
zum syni Baiz zue dynere z’mache …
die Frässerei in Ehre, aber s’wirgglig Dumme
isch das dummi Gschnuur am Disch drum-umme
gwyssi Type gänn sich do als Kenner uss
aber merggsch scho gly, die kömme nit rächt druss:
«Gigot» haltet aine fyr ebbis vo dr Kue»
«ablösche» - das haig mit dr Fürweer z due»
und redet me gschmagglig vom e «tolle Bouquet»
findet aine, «also Blueme ha-n-y kaini gsee»
schliesslig schwärmt ain, e «coq au vin»
syg «al dente» und «bien crû» – also immer au «à point»
und bezaichnet denn no näbeby
dr Riesling Silvaner als Dessertwyy
und aini sait ganz gschiid,» jä waisch –
e Haggdätschli – dasch im Grund gnoo jo gar kai Flaisch!
Aimool kritisiert ain s’Aesse esoo:
s Menü syg e gly z’»billig» yberekoo
offebar haig me s Dekoriere vergässe –
und au das uf em Däller säch uss, wie scho gfrässe
Oebber will s’immer püriert – und meegligscht vyll
und ain motzt, will er immer nur d Helfti will
e-n-Andre isst kai Wild, kai Lamm, kuum Gmies und kai Fisch
waisch verdeggel nit, worum dää in d’Sändig koo isch
Bringe sy öbbis z exquisit
denn goots den ainte immer z wytt
bringe sy öbbis ganz normal
no ischs den andere zue banal
aim sy Urdail isch bsunders fiin
är findet s Poulet z’feminin
aini duet bym Flaisch dr Gnoche vermisse
aber dä nääbedraa sait, är haig grad uf ain bisse
en elteri Dame, wo sich uff s’Koche verstoot
sait den andere am Disch, wie das am beschte goot
do will ere aine gratuliere, hett sich aber liicht versproche:
«jo gälle sy, uf alte Pfanne leert me hald scho koche!»
Rächt hyfig isch me uuf Exotisch’s ussggwiiche
und hett das denn mit Schwyzer Koscht vergliiche …
Insäggde hetts kuum gää – und das isch schaad
und au kaini Schnägge im Salat …
Schwizer Gricht die fääle öfters – das beklaag y
Kuum ain woogt sich an Oehrli, Schnöörli und an Gnaagy
Woorschynlig hett men Angscht kha, dass das aine nit verdraagy …
Isch dr Mischt denn gfiehrt und hänn alli diniert
no wirds vo Note ains bis zää prämiert
Ain hett kuum ebbis gässe, losst sich’s aber nit nää
und gitt, nur will’s schön usseet, grad e Zää
oebber gitt nur e Nüün – dr Grund hett er gnennt
är haig sich am Däller d Finger verbrennt
e pfläggdi Dame gitt numme e Siebe
d Serviette syg vergäasse bliibe…
en anderi lobt zwoor s ganzi Aesse
gitt denn aber nur en Acht – sy syg drum z hart gsässe

Myni Baiz – Dyni Baiz – kuum ischs verby
do strooft me n ys wieder mit sonere Serie
My Schwyz isch dy Schwyz – hett neyschtens sy Raiz
jetz goots um s Ganzi – nimm numme um e Baiz
Vyllicht dien sy an dr Fasnacht uf Basel koo
Aber gäll, denn blybt hoffentlig kain grad do …
Wemmer jetz das Wortspiel no bybhalte wotte
gäbs verglyychswyys au no andri Marotte
So froggt en Apitheek am Stainebärg – isch ächtsch myni
Clinic nit vo moorn aa gly au dyni?
Und fyr die vyle Drootesel, wo ummesteen
Und per App scho bald e jede faare leen
isch dr Slogan «my Velo isch dy Velo» lengscht scho e Hitt
Nur by «My Mäss – dy Mäss» macht me z’Basel nimm mit
wills usser Riesehalle und Dirm – bald kai Mäss me gitt
aber ebbis stellt sich in baide Basel global
nämmlig d Froog: isch’s jetz my – oder dy – oder unser Spital?

My Baiz – Dy Baiz – Note zää und derzue e Krönli
griegt fyr uns alli derfyr s Pensiönli
dert fyylt sich kaine je ellai
do sinn d Schlurbbi, dr Stamm und die Junge dehai
fyr d Zuekumft mecht y aine no uuseloo:
gäll, dr Stammdisch isch denn immer fyr alli doo…!
und trotz mänggmool e baar schwarze Frikadelle
kasch yber d Kuchi au numme s Beschti verzelle
Das alles hämmer so bhalte welle
Schlurbbi oder Stamm – numme ains duet zelle:
im Pensiönli und fyr d Fasnacht- schwinge baidi d Kelle!