Schnurebegge Schlurbbi - Fasnacht 2018

Mer trotze de Bräschte - und gniesse dr Räschte

Me isch scho lengschtens uss em Alter, uss em zarte
Wo aim no dr Ehrgyyz gstoche hett
de hesch's verroote - me-n-isch hald en alti Garde
und blybt als ab und zue am Morgestraich im Bett
und muess men als im Cortège uff ys warte
mir gniesses trotzdäm no – e jedi Wett !
Friehner hetts dy paggt – hitt duets dy no ne bitzli braiche
duesch uff dr Gass nimm wirgglig yberborde
de spyyrsch dr Joorgang halt scho in de Schaiche
und bisch sälber fascht e Baustell worde
e Baustell do – e Baustell dert – das isch nit glatt
due aber trotz de Bräschte nit grad resigniere
Baustelle hetts waiss Gott au gnueg in dääre Stadt
und ai Regierigsroot hetts trotzdäm nooni satt…
Mir aber nämme s liicht, dien unterwäggs enand massiere
und in de Pause Pille schlugge, Pämpers aazieh, inhaliere
denn ka n ys trotz de Bräschte nit so vyyl bassiere
und mer sinn au noo dr Fasnacht nit so schnäll schachmatt
Im Ruggge foots als afoo zieh – dr Ischias duet brenne
de laufsch am Taggd verbyy – und kunnsch nimm richtig mit
s Marschtämpo macht der Mieh – muesch hindenoocherenne
verliersch dr Aaschluss gly – und s schlimmscht isch erscht no: merggsch es nit
Und griegsch dr Gluggsi, ischs der au zum Kotze
sesch nimm duur d Larve duure und bisch sunscht nit fit
no gitts au doo e Tipp, wie’d dääne Altersbräschte no kasch trotze
nimm dr Rollator oder gang als Requisit
s letscht aber macht dr allerdings au Mieh
fändsch nämmlig by de Schlurbbi kaine, wo dy denn wurd zieh…
Sticht ebbis in de Schueh, so wie ne Sprisse
hoggsch aifach kurz an soone hooche Stroosserand
Und griegsch denn, wenn de wieder uffstoosch – s Risse
no ischs kai Schand, mer liiden alli mitenand
und foot au bletzlig d Lungen afoo pfyffe
mach der nyt druss und schigg dy dry
und duet sich s Gney afoo verstyffe
dänggsch s muess so sy und bindschs hald aifach yy
Und heschs als Dambuur schwäär, dy Kyybel z draage u
nd kai Speyz bym Pfyffe, denn bloos aifach dry
kasch dy bym Marschhalt denn beklaage
und nimm zwai grossi Dafalgan mit Wyy
Trotz allne Bräschte isch’s fyr d Fasnacht noni z‘spoot
Wenn d no ellai dy Wääg kasch finde
s bym Laufe hundert Meter vorwärts grad no goot
wenn d‘no waisch, was vornen isch und hinde
und au immer e Kolleeg findsch, wo dr Schueh duet binde
und wo Dy in Dynre Not verstoot….
Oebbis duet der s Lääbe au erschwääre
kuum goots los, scho in den erschte Meter
wenn de merggsch – ojee - de sottsch dy Blootere lääre
wartsch aifach bis zum Comité, dert gänn’s der e Katheder
Au mit dääne Bräschte bruuchsch dy nit z verschlaufe
fyr Triebsal z bloose, do bestoot kai Grund
s ainzig, wo d muesch mache, wenn’d im Vordrab gosch go laufe
muessch immer hindereluege, ob do au no ebber kunnt….
Ganz glyych wie me uns Alti duet erkenne
als Gniembbi, als Komposchti oder Runzle
und wie men ys au sunscht no kennti nenne z
um Bischpill Gleezi, Gnagger, Grufti oder Pfunzle
mir hänn alli ebbis gmainsams , merggsch es gly
sygs an dr vordere oder hindere Fassade
sygs im Innelääbe oder an dr Karosserie
e greessere oder au e glainere Schaade
schigg di dry, stimm in das alti Lied mit yy:
„wägedäm muesch Du nit druurig sy“
Hesch um dr Arm e Schlinge – in de Zähn e Lugge
hesch dr Schysser oder s Geegedail
bisch nimm ganz dicht und kasch dy nimm rächt bugge
fäält der an dym Gnochegryscht e Dail
duesch dy bym Gurgle als verschlugge
findsch s Stäägelaufe nimm so gail
denn dreescht dy – jede liidet das isch s Btteri
an irgendebbisem und syg das nur dr Zitteri
Wenn me mit dr Schwäärgraft uff em Kriegsfuess stoot
und aim vo lutter Hingge jede Schritt duet stingge
wenn’s vyyl schnäller aabe, als denn wieder uffe goot
und de zwyschenyyne numme no Kamilletee wottsch dringge
gitts do derfyr dr beschti Root:
gang in en alti Garde, denn do griegsch dy Gnadebroot
denn au für Kätzli z’risse isch’s e weeni spoot
ziehsch nämmlig d Larven ab, no lache die sich z’dood…
Drum steen mer dissjoor jetz mit alte Gsichter doo
wenn mer die Larven abziehn, ka sich kain me irre
undefiire kunnt - die gliichi miedi Biire…
Bisch aber vo dr Fasnacht no so uff em Hund
kuum isch e Joor verby, und foosch en afoo schmegge
dr Larvelagg - denn waisch, s'lauft immer wieder rund
und duet, so lang de läbsch, dr Bebbi in der wegge
Erscht das nimm z'fyyle, wär doch s'wirgglig Harte
drum loont sich's, s’trotz de Bräschte, d Glieder z stregge
esoo wird nämmlig jede gly entdegge:
was s Bsundre ussmacht vonere alte Garde:
Fasnacht spilt trotz alle Schmärze
sich ganz dief im Inneren ab
und hesch au immer ebbis z bäärze
fyyhlsch dy au mänggmool mied und schlapp
bhaltsch dr Fasnachtsgaischt im Härze
denn schaffsch trotz aller Art vo Bräschte
als ächte Schlurbbi au no jede Räschte !!