Sääbelrassle

D Maiere* giftelet - es isch e Gruus -
d Frau Hueber* aa, im Stäägehuus:
Si däät der Weschblaan nid benutze
und s Fluuse-Siib nie grindlig butze,
däät der Abwart duurend umme hetze
und jede Moorge d Huusdiir‘ schletze!
D Huebere schnauzt zrugg: „Si Schääse,
kenne d Huusornig nid richtig lääse
und kläbbere z‘mitts in d Nachtrueh
mit ihre primitive Steggeli-Schueh!
Ass Si’s wisse, vo Ihne han-y gnue:
Si sinn e ganz en impärtinänti Kueh!“
Druf brielt d Maiere: „Si Fudi-Gsicht:
Jetzt sehn mir is denn vorem Gricht!“
Jeedi macht der andere e bitzli Schiss,
d Auge speie Fyyr, ‘s klabbere d Gebiss,
beesi Drohige dien hi und här prassle.
Im Stäägehuus herrscht Sääbelrassle!


Graad wie sälbetsmool die beese Heere
Piraate uf em wytte Meer, uf de Galeere
(Mit Hooggehand und klabbrigem Holzbai
Sääbel, Augeklabbe und eme Papegei),
duet hitt, wär Macht wott demonstriere
und zinftig wott, sym Gegner imponiere,
nid um der heissi Brei lang umme quassle,
nai, nimmt sy Sääbel und duet gheerig rassle!


Soo git me syne Gegner s dyttlig Zaiche:
Y wott Dir jetze ebbis ungschminggt saage:
Vo Dir lohn y mir nid an d Schaiche saiche!
Du kasch mir iberhaupt kai Angscht yyjaage!
Du kasch mir drohe und kasch dräggig lache,
kasch mi belaidige und kasch dumm blabbere.
Aber zem Schluss duen ICH Di fertig mache!
„Gäll Birschtli, heersch mi Sääbel klabbere?“


Iber wirgglig alles duet me hitt efange strytte;
duet sich geegesyttig d Lääbesfraid vermassle.
Lueg in d Zyttig oder im Netz uf d Forum-Sytte:
Iberall duet irgendebber mit em Sääbel rassle:


Es rassle die rächte Politiker hart geege Linggs.
Und nid weniger zart die vo Linggs geege Rächts.
Maischtens goht’s um Bedyttigslooses, Grings.
Me rasslet und prophezeit em Gegner Schlächts.
Geege s Baselbiet fuchtle d Stedter mit de Sääble:
Wär mitbestimme wott, bläch au gfelligscht ganz!
Doch vo Lieschtel duet‘s bedrohlig zrugg rääble:
„Mir sääge nur Marg‘rethestich und Hülfteschanz!“
Es rassle d EU-Sääbel gege d Leuthard z‘ Bärn,
Geege der Schneider-Ammann rassle alli gärn!
Der IS rasslet mit em Sääbel und duet terrorisiere.
D Catalone rassle, si wänn sich ändlig separiere!
‘S wird g‘rasslet fir und geege Veloopumpstazioone,
Pro und contra „NoBillag“, fir und geege s Kloone.
Es rassle d Vegaaner geege die Insäggte-Frässer,
d Mohrekopf- Gniesser geege d Schuumkopf-Ässer,
me rasslet geege s Metzge vo Säu, geege s CBD-Kiffe,
FCB-Grääber, genderneutrali Toilette zem Schiffe,
d Stüüre, d Granggekasse, d Nullerzinse bi der Bangg
(Me sig gopfridstutz weder Kiosk no Kasseschrangg!),
geege Grossreet, wo statt schaffe, Bier dien dringge,
Club-Preesidänte, wo Expärte ohrfyyge und gingge.
YB rasslet, si hoole dä Maischtertitel daasmol logger.
Der FCB rasslet zrugg mit de Herre Frei und Stogger.
Kurz: ‘S wird mit em Sääbel g‘rasslet, es wird bällt
Geege d Macht und s Gäld, geege Gott und d Wält!


Doch die zwei schlimmschte Säabelrassler,
sälbschtiberschetzt, vyyl z‘ lutt und plump
Und wältwyt bstimmt die dimmschte Quassler,
die haisse: Kim Jong-un und Donald Trump!


Der Donald mit der gääle Windstooss-Fryyse,
isch US-Preesidänt, e sehr e gspässig Wääse.
Regiert d Wält per „Tweets“, so fyyse, myyse
und het no nie e Buech oder e Zyttig glääse.
„America first“, dä gladdi Slogan duet är wähle,
mit „fake news“ drybt är syni beese Spässli,
ai grossi Sorg, duet global d Mensche quääle:
Fähle däm im Schränggli ächt ‘baar Tässli?


Der Kim mit syner schwarze „Boyband“-Fryyse,
fiehrt Nordkorea mit ganz yysig-stränger Hand
vo ainere Katastrophe in die näggschti Kryyse,
mit Gwalt und - offesichtlig - null Verschtand.
Är duet zwor nid uf Twitter ummenander wättere,
derfir kasch en uf TV-Nordkorea schwaafle seh,
Aakindet vonere alte Staatsfärnseh-Tschäddere.
Au do d Froog: E Schruube lugg? Oder no meh?


Momentaan, do lehn die baide wirre Irre
uf jede Fall ganz gheerig ihri Sääbel klirre:
Der Donald giftelet us em Wysse Huus
der Kim z‘ Pjöngjang aa - ‘s isch e Gruus:
Är sig‘ e ganz primitive, glaine, faisse Maa.
Und droht em gnaadeloosi Sanggtione aa:
„Uf myni gliebte Dollar ka Der ‘s schweere:
Dyy Nordkorea wird y bald totaal zersteere!“
Der Kim schnauzt zrugg: „Jetz hämmer Mais!
Du demänte und gaischtesgrangge Grais!
Wart‘s nur ab! Y loh scho in mym Gaarte
Wasserstoffbombe-Tescht-Raggete staarte!
ICH bi der Greescht, Du schwach und schlaff,
Du bisch doch nummen e debyyle alten Aff!“
Der Trump git em zrugg: „Du Fudi-Gsicht:
Bald stohsch Duu vor em letschte Gricht!
Ich schlaus, stabyyls Genie - due Di verdamme
Und setz Di und Dyy Land brutal in Flamme!“
Der Kim: „‘S stoht nääbem Kaffi und em Zopf
uf mym Zmoorgedisch dä beriehmt root Knopf!
Do muess y nur aimol ganz kurz druf drugge
und scho dien d Atombombe-Blitz loszugge!“
Der Trump: „Waisches nonig, duet mir schyyne:
My Atom-Knopf isch vyyyyl gresser als Dyyne!“


So gänn die baide sich konstant uf d Fingge,
wie zwai Piraate, wo dien drohe und dien prahle
und ganz gfährlig mit de scharfe Sääbel wingge:
„Y bi der Schtergger, Du wirdsch’s bitter zahle!“


D UNO verkindet jetz scho: „Alaarmstuefe root!“
Und wiete die zwei Type au kinftig esoo grimmig,
denn isch uns‘re Wältfriide ganz fescht bedroht
von ere grosse (nid luschtige) „Bombestimmig“!


En Albdraum wär’s, die zwai dääte wytter dumm…
Ain wurd dä root Knopf wirgglig drugge…
und: BUMM!!!