Worum au Du e Schnurebegg wärde sottisch

Über uns

Mir sind die Jungi Garde vo de Schnurebegge, e Männerclique. Natürlig sind mir au alles Buebe und händs minand zämme luschtig. Mir sind aber nid eifach nur us Tradizion e Männerclique, sondern mir lääbe das au.

Es isch bi uns sälbverständlig, ass mir als Fasnachts-Clique Wärt uff s Musikalische und s Frindschaftlige leege. Es heisst jo nid ohni Grund: "Eimol e Schnurebegg, immer e Schnurebegg".

Alles was mit dr Fasnacht z due het, wird vo uns Junge mitbestimmt, drzue ghört d Sujet-Waal, s Larve-Moole genauso wie z.B. s Berügge gnüpfe.

Duurs Joor duure händ mir ganz verschiedeni Aaläss. Lueg emol in unsere Terminkaländer.

Während unserem jöörlige Iebigsweekend dien mir Jungi s Sujet für die näggscht Fasnacht bestimme und wo mir s'musikalische mit dr Sujetwahl und e huffe glatte Aktione verbinde.

Unseri Inschtruggder sinn erfaare, musikalisch sehr begobt, teilwiis extärn und au pädagogisch sehr guet.

Wär noonig kaa pfyffen oder drummle, dä lauft bi uns im Vordraab mit. An dr Fasnacht wärde mir Junge vo Erwachsene begleitet und betreut, unsere Bärefiehrer. Sälbverständlig hän mir jedes Joor e tolli Ladärne und e tolls Requisit, wo mir immer gmeinsam vor dr Fasnacht dien baschtle. Wie das denn usgseht, gsehsch du do: Rund um d Fasnacht.

Du seesch, bi uns lauft immer ebbis, wie du das au do gsehsch: Was lauft? Bi uns wirsch au DU Di ganz schnäll dehaim füüle.

Willsch no meh wüsse oder willsch Di aifach amälde, denn nimm doch Kontaggt mit em Christian uff, unseren Obmaa vo de Junge: Kontaggt.

Iebigsstunde

Mir hän unser Iebigslokal im Claraschuehlhuus. Das isch toll, denn esoo hän die Junge au s Joor dure Kontaggt mit em Stamm.

Übungslokal:
Claraschulhaus am Claraplatz (im oberschte Stogg)

Übungstag: Freitagabend
  • Tambouren
    • Anfänger: 17:15 bis 18:00 Uhr
    • Fortgeschritten: 18:00 bis 19:00 Uhr
    • Spiel: 19:00 bis 20:00 Uhr
  • Pfeifer
    • Anfänger: 17:15 bis 18:00 Uhr
    • Fortgeschrittene: 18:00 bis 19:00 Uhr
    • Spiel: 19:00 bis 20:00 Uhr