Pensiönli, d'Heimet vo de Schlurbbi

Am 6. Juni 1998 hämmer unser Pensiönli  könne in Bedriib nää. In de ville Joor sithäär isch s Pensiönli zer Haimet vo de Schlurbbi worde.
E Glyggehaimet wo mer wüsse, wo mir uns finde, wo mer unseri Iebige abhalte, wo mer zämmehöggle und brichte könne, wo mer unseri intärne Aaläss könne durefiehre und won ys vorzüglig als Larvenatelier dient. S Pensiönli het für der Kitt bi de Schlurbbi unerhört vyyl brocht. E Tatsach, wo je lenger deschto wichtiger wird. Mer hän der Friiden im Pensiönli.

Wie sin d Schlurbbi aber zem Pensiönli koo? Mer bländen e weeneli zrugg:

S Huus 'zum Kronenberg' an der Rhygass 29 stammt uss em Middelalter. D Jooreszaal 1538 über der Düre wyyst uff d Zämmefiehrig vo de baide Hüüser 'Oberer Kronenberg' und 'Unterer Kronenberg' hii. S Huus isch im spootgotische Stiil baut und isch in syner lange Gschicht maischtens vo Glaibasler Handwärggerfamilie bewohnt worde. Bekannt worden isch die Liigeschaft in neuerer Zyt dur d Yvonne und der Jules Huber. S Hubers hän in däm Huus wääred ungfäär 30 Joor e Pension bedriibe, wo Rhyschiffer, Baanaagstellti und anderi 'Durchraisendi' Underkumft gfunde hän. D Pension Huber oder ebe s 'Pensiönli' isch im Glaibasel zem Ghaimtipp worde, wil men in der Baiz im Parterre noo Wirtschaftsschluss immer no het könne (über)höggle, aine sirpflen und ebbis mampfe. 

Wo s Ehebaar Huber d Pension uus Altersgründ uffgää und verloo het, hän d Schlurbbi die läär-stehendi Baiz als Larvenatelier könne nutze und unseri Hobbyköch hän glyy emool d Kuchi in Bschlaag gnoo zem iirem Stäggepfärd z fröönen und iiri Glyygekolleege z be-koche. In dääre Zyt isch d der Gedangge uffkoo: Worum aigentlig s Pensiönli nit duurhaft übernää? E baar Prota-gonischte hän sich der Sach aagnoo und derby uusegfunde, dass der Architekt Werner Walther d Liigeschaft vom ZLV möcht erwäärbe, renovieren und in Aigedumswoonige umbaue. Die ehemooligi Baiz isch für d Schlurbbi ganz blötzlig als Stogg-wärggaigedum in gryfbaari Nööchi gruggt.

Aber wie sell en Alti Garde wie d Schlurbbi son e Kauf finanziere? D Gründig von ere Gnosseschaft isch d Löösig gsi, wo sich aabodde het. D Schlurbbimitgliider hän Aadailschyyn zaichnet und scho bald het d 'Gnosseschaft Pensiönli' s Parterre im Stoggwärgg-aigedum können erwärben und vermietet das Lokal syderhäär an d Glygge. Sowyt isch aigentlig alles rund gloffe, bis uff dä Momänt, wo der Architekt koo isch und gsait het, es syg em e glaine Fääler underloffe. Är haig bi der Stoggwärgg-Aigedumsbegründig vergässe, die allgemaine Köschte uff die ainzelne Ainhaite z verdaile. Unser Pensiönli koschti jetz 200'000 Frangge mee. Das het är ys zäh Dääg bevor mer bim Notar abgmacht hän, verzellt. Mit zinsloose Darlehe, wo innerhalb vo dääne zäh Dääg vo Schlurbbimitgliider glaischtet worde sin, simmer kurzfrischtig uus de Bredouille gsi. Underdesse het jede Darlehensgääber sy Gäld scho lengschtens wider zrugg griegt.

Wo das alles greeglet gsi isch, het e Baukommi-sion mit em Initiant Pauli Kaiser und sehr vyyle Hälfer uus der alte Baiz e faszinierend Glyygelokal samt modärner Kuchi und sanitäären Aalage gschaffe. Wäred der Bauzyt sin d Schlurbbi aber nonemool gluschtig worde: Uff e Sääli im Hinder-hoof! Sy sin nonemool über d Biecher und hän sich entschlosse, au dää Ruum z kaufe und drin e Glyggestube yyzrichte. Zwische de baide Rüüm lyt e Hööfli, wo au derzue ghöört und wo sich für allergaddig Freyluftaaläss aignet. 

Underdesse het s 'Pensiönli' in der Fasnachtswält und der tradizionelle Glaibasler Szene Furore gmacht, s isch zer Inschtituzioon worde. Die ganzi Deggorazioon mit Ladäärne, Bilder und Aadängge sin sehenswärt und laade zem Verwyylen yy. Verwyyle dien d Schlurbbi im Pensiönli uusgiibig, s isch schliesslig s Zentrum vo iirem Glyggelääbe worde. Gärn verwyyle dien aber au unseri Gescht, wo zuen ys kömme, wemmer am Vogel Gryff, am Glaibasler Källerabstiig und an der Fasnacht für alli offe hän. Und ganz bsunders willkomme sin nadyrlig allewyl d Mitgliider vo unserem Stamm-verain und vo der Junge Garde, aber au Familie, Verain und anderi Gsellschafte, won en Aalass in Pensiönli möchte durefiehre.

 

StreetView